Sleppa ikki at seta so nógv smolt út

Lýs í sunnara aliøki á Gøtuvík og í Leirvíksfirði suður hjá Bakkafrosti farming gera, at felagið sleppur ikki at seta út so nógv smolt, sum søkt var um.

Tað hevur Heilsufrøðiliga starvsstova avgjørt.

Søkt var um eina millión smolt í báðum førum, men loyvi er givið til ávikavist 700.000 og 900.000 smolt.

Heilsufrøðiliga starvsstovan heldur ikki, at Bakkafrost hevði tamarhald á lúsastøðuni í rakstrarumfarinum 2021-2022.

Fellið er vaksið

Fellið í aliøkinum, sum eitur A-25, er vaksið síðani seinasta umfar.

Mett verður, at fá átøk eru rættað móti teimum avbjóðingum, sum vóru seinasta umfar, samstundis sum fleiri óvissur eru knýttar at átøkunum, sigur Heilsufrøðiliga starvsstova. 

Hinvegin hevur Bakkafrost fingið fellið niður í aliøkinum A-47 millum tvey tey seinastu rakstrarumførini, tey eru frá 2019 til 2021 og frá 2021 til 2022, sigur starvsstovan. 

Ein neyvari lúsaætlan gevur sannlíkindi fyri eini upp aftur betri lúsastøðu í umfarinum 2022 til 2024, sigur starvsstovan.