Jólastjørnan sást á himmalinum

Talan er um gongustjørnurnar, Venus og Jupiter, sum í sínum ringrásum um sólina, vóru í eini sokallaðari samstøðu, ‘conjunction’.

Gongustjørnurnar sóust sum tvær allýsandi perlur í gjárkvøldið. Onnur størri enn hin. Tann minna var Venus og tann størra Jupiter.

Jupiter og Venus

Samstøðan var hugtakandi at síggja í klára veðrinum í gjárkvøldið. Mynd: Bjarni Árting Rubeksen

Samstøðan hevur hugtikið fólk, tí sosialu miðlarnir vóru á tremur við myndum ymsastaðni í landinum.

Hugtók børnini

Nakrir skúlaflokkar og frítíðarskúlar kring landið høvdu sokallað stjørnukvøld í gjárkvøldið. Har hoyrdu tey søgur um gongustjørnur, stjørnumyndir og himmalrúmið. Við stjørnukikara bar væl til at síggja fleiri av mánunum, sum eru í ringrás um Jupiter.

Børn kika í stjørnukikara

Frítíðarskúlin Spírin í Havnadali skipaði fyri stjørnukvøldið í gjárkvøldið. Mynd: Kári Sólstein

Sjálvt um tað sær út til, at gongustjørnurnar eru nær hvør at aðrari, so er fjarstøðan millum tær einar 600 milliónir kilometrar. So tað var ongin vandi fyri, at tær bresta saman.

Sandavágs kirkja, Jupiter og Venus

Mynd: Bjarni Árting Rubeksen

Jólastjørnan

Samstøður millum tær ymisku gongustjørnurnar henda javnan, og fyri 2000 árum síðani var júst henda samstøðan, sum nú sæst á himmalhválvinum. Ár 3 fyri Krist vóru Venus og Jupiter í eini enn tættari samstøðu, enn hon ið sást í gjárkvøldið, og eitt stjørnufrøðiligt ástøði sigur, at hetta himmalfyribrigdið kanska hevur verið bjarta stjørnan, sum vísti vísmonnunum veg til fjósið og krubbuna. Tann so kenda jólastjørnan, sum lýsti yvir Bethlehem.

Jupiter og Venus

Samstøðan millum Venus og Jupiter var tættast í gjárkvøldið. Mynd: Bjarni Árting Rubeksen

Er stjørnuklárt í kvøld, ber eisini til at síggja samstøðuna millum gongustjørnurnar, Venus og Jupiter, sum nú fara longri burtur hvør frá aðrari.

Mánin

Mánin sæst eisini óvanliga høgt á himli fyri tíðina. Mynd: Bjarni Árting Rubeksen

Tað var Bjarni Árting Rubeksen, sum var úti við myndatólinum í gjárkvøldið.