Zelensky vil hitta Putin

Ukraina hevur biðið Turkaland um at vera vertur fyri einum fundi millum Volodymyr Zelensky, forseta, og russiska forsetan, Vladimir Putin.

Tað boðaði ukrainski uttanríkisráðharrin frá á tíðindafundi í gjár, skrivar Reuters.

- Ukraina er sinnað at umhugsa eitthvørt stað at hittast, tó ikki í Hvítarusslandi ella Russlandi, til fund við Putin, sigur uttanríkisráðharrin í landinum, Andriy Sybiha, sambært tíðindastovuni.

Sybiha segði einki um, hvussu turkiskir myndugleikar hava svarað uppskotinum. 

Ikki fremsta mál

Hvørki Turkaland ella Russland hava gjørt viðmerkingar til málið, men um vikuskiftið segði russiski uttanríkisráðharrin, Sergei Lavrov, at friðarsamráðingarnar við Ukraina ikki eru fremsta mál hjá Russlandi.

Russland, Ukraina og USA, sum hevur roynt semju, hava ikki hitst til samráðingar síðani miðskeiðis í februar. Síðani tá eru ætlaðar samráðingar avlýstar orsakað av Iran-krígnum.

Zelensky hevur heitt á USA og Russland um at halda fram við friðartilgongdini, men amerikonsku semingsmenninir, Steve Witkoff og Jared Kushner, eru upptiknir av samráðingunum millum USA og Iran.

Álopskríggið hjá Russlandi á Ukraina hevur nú vart í meira enn fýra ár.