- Tíðindi, mentan og ítróttur
Føroya rættur latið annað fólkið í harðskapsmálinum leyst
![](https://kvf.fo/sites/default/files/styles/grein-ovasta-mynd/public/vlcsnap-2023-10-18-14h53m16s729.png?itok=rjfPZ6bZ)
Føroya rættur viðgjørdi í morgun, um tvey fólk, sum eru skuldsett fyri harðskap móti einum barni, skulu sita longri í varðhaldi.
Ákæruvaldið vísti í rættinum á, at neyðugt er við longdari varðhaldsfongsling, tí ein kanning er ikki liðug.
Men tað tók rætturin ikki til eftirtektar, og avgjørdi at lata annað annað fólkið leyst. Hitt fólkið, sum er skuldsett í málinum, vildi sjálvboðið leingja varðhaldsfongslingina eina viku.
Ákæruvaldið kærdi avgerðina um leyslatingina til Landsrættin og bað um, at fólkið, sum Føroya rættur avgjørdi at lata leyst, verður sitandi í varðhaldinum, til Landsrætturin hevur gjørt úrskurð, væntandi í morgin.
Skuldsett fyri grovasta harðskapin
Fólkini bæði eru skuldsett fyri harðskap móti einum tríggjar mánaða gomlum barni.
Tey eru skuldsett eftir grein 246 í revsilógini, sum er um grovasta harðskapin.
Tann greinin sigur, at hevur harðskapurin við sær annans deyð, ella er hann aðramáta so grovur, ella hevur so álvarsaman skaða við sær, at talan er um serliga skerpandi umstøður, kann revsingin vaksa til fongsul upp í 10 ár.
Barnið fekk álvarsligan skaða.