Finnar á val

Finnar fara í dag í valhølini at velja nýggjan forseta. 

Níggju valevni bjóða seg framm at taka við eftir Sauli Niinistö, sum hevur verið forseti síðan 2012.

Sambært veljarakanningunum eru tað serliga trý valevni, sum skilja seg úr rúgvuni.

Tað skrivar danska kringvarpið. 

Tey trý valevnini eru fyrrverandi forsætisráðharrin Alexander Stubb, sum liggur fremst í kanningunum, fyrrverandi uttanríkisráðharrin Pekka Haavisto, og núverandi tingformaðurin í finska parlamentinum, Jussi Halla-aho. 

Um einki valevni fær meira enn 50 prosent av atkvøðunum er neyðugt við umvali millum tey bæði valevnini, ið fingu flest atkvøður.

Um tað verður neyðugt við umvali skulu finnar aftur á val 11. februar.