USA vil eisini gagnnýta náttúruríkidømið í Grønlandi

Amerikanski áhugin fyri Grønlandi snýr seg ikki bara um geo'politikk, men eisini um at gagnnýta ovurhonds stóra náttúruríkidømið í Grønlandi.

Tað segði amerikanski guvernørurin, Jeff Landry, við sjónvarpsrásina Fox News, eftir at hann var komin heimaftur til statin Louisiana eftir vitjan sína í Grønlandi.

Jeff Landry er eisini serligur sendimaður hjá Donald Trump, forseta, í Grønlandi. 

USA kann hjálpa

Sambært guvernørinum kann USA við Donald Trump á odda hjálpa Grønlandi at fáa fatur á hesum náttúruríkidømi:

- Hetta hevði givið teimum ríkidømi, eins og olja og gass gav ríkidømi til Louisiana og amerikonsku tjóðina. Forsetin vil hava eina avtalu, og Grønland hevur brúk fyri eini avtalu. Grønland kundi útflutt tvær milliónir tunnur av olju um dagin beint nú, segði Jeff Landry.

- Tað hevði tikið nógv trýst av oljuflutninginum gjøgnum Hormuzstundið. Tað hevði havt stóra ávirkan á vestaru hálvu og USA. Tað hevði verið stór hjálp fyri Evropa. Sleppa vit í gongd, so kann Grønland útvinna olju innan 10 mánaðir, segði Jeff Landry í samrøðu við Fox News eftir vitjan sína í Grønlandi.