Alexander Stubb nýggjur forseti í Finnlandi

Konservativi Alexander Stubb vann forsetavalið í Finnlandi í gjár.

Alexander Stubb fekk 51,6 prosent av atkvøðunum og liberali Pekka Haavisto 48,4 prosent. 

Stubb vann valið í 261 kommunum,  m.a. í stóru kommununum Esbo, Vanda og Vasa.

Haavisto vann í 48 kommunum, m.a. í Helsingfors, Tammersfors. Uleåborg og Åbo.

Minni enn 99.000 atkvøður vóru millum Stubb og Haavisto.

Alexander Stubb og Pekka Haavisto

Alexander Stubb og hitt valevnið, Pekka Haavisto, sum ynskir nýggja forsetanum til lukku við valinum. (Mynd: AFP/Ritzau Scanpix)

Viðgekk tapið

Pekka Haavisto boðaði í gjárkvøldið frá, at hann hevði tapt forsetavalið fyri Alexander Stubb. Teir heilsaðust, og Haavisto ynskti Stubb blíðan byr sum forseti.

Veljarakanningar vístu undan valinum, at Stubb fór at fáa 51,4 prosent og Haavisto 48,6 prosent.

Stubb er royndur í politikki. Hann hevur verið forsætisráðharri, uttanríkisráðharri og limur í ES-tinginum.

Og nú hann tekur við som forseti, fer hann úr professarastarvi á lærdum háskúla í Italia.

Alexander Stubb verður 13. forsetin í Finnlandi og tekur við starvinum eftir floksfelaga sín, Sauli Niinistö.

Les meira um finska forsetavalið her.