Talgild undirvísing, tá ferðasambandið er vánaligt

Fýra miðnámsskúlar hava reglur um talgilda undirvísing, tá ferðasambandið er so vánaligt, at næmingarnar ikki kunnu koma í skúlan.

Tað sigur Djóni Nolsøe Joensen, landsstýrismaður, í svari til Jóhannis Joensen, løgtingsmann, sum spurdi um næmingafráveru í miðnámsskúlum.

Svarið er, at allir miðnámsskúlar hava egnar lestrar- og skilhaldsreglur. 

Og í fýra teirra eru reglur um talgilda undirvísing, tá ferðasambandið er vánaligt.

Í løtuni eru ikki felags ásetingar um fráveru, tá veðrið ávirkar samferðsluna, sigur landsstýrismaðurin.

Mannagongdir um fjarundirvísing og fráveruskráseting eru ásettar í skilhaldsreglum fyri einstaka skúlan.

Eingin skúli eigur at fremja agatiltøk móti næmingi, sum ikki kemur í skúla fyri veður, sigur landsstýrismaðurin.