Føroyar fáa lættari leið til EM-endaspælið næstuferð

Søguligi javnleikurin móti Norra í Berlin, tá Elias Ellefsen á Skipagøtu javnaði við brotskasti í síðstu løtu, slóðar fyri einari lættari leið fram til næsta EM-endaspæl í honbólti.  

Verður javnleikurin samantvinnaður við hinum góðu úrslitinunum, ið A-landsliðið í hondbólti hevur fingið seinastu árini, sum ber tað við sær, at Føroyar verða í næstovasta styrkibólki, tá lutakast um komandi EM-undankappinginina verður 21. mars.

Manslandsliðið í hondbólti er nú styrkimett sum nummar 20 í Evropa í løtuni. 

EM24, EM í hondbólti 2024, Føroyar, Pólland, Elias Ellefsen á Skipagøtu

Sleppa undan sterkum tjóðum

Við at vera í næstovasta styrkibólki, sleppa føroysku menninir undan londum sum Eysturríki, Montenegro, Serbia, Póllandi, Kekkia, Norðurmakedonia og Grikkalandi.

Julian Johansen, hjálparvenjari, fegnast um støðuna. 

"Tað hevur sjálvandi øgiliga nógv at siga fyri okkum, at vit eru fluttir ein styrkisbólk upp, tí tað ger okkara møguleikar so øgiliga nógv betri, tí vit sleppa undan teimum allarsterkastu londunum."

Styrkimetingin byggir á úrslitini seinastu árini, og har telur javnleikur móti Norra nógv. Men eisini tann sannroynd, at Føroyar spældu seg til EM-endaspælið í Týsklandi í januar, hevur nógv at siga. 

EM24, EM í hondbólti 2024, Føroyar, Pólland, Pauli Jacobsen

Ansa eftir ikki at blíva vónbrotin

Hóast fyritreytirnar eru betri at spæla seg til EM-endaspælið, nú manslandsliðið í hondbólti er styrkimett í næstovasta bólki, er tað er ikki ein avgreiðsluspurningur at spæla seg til EM í 2026.

"Tað er í fínasta ordan, at fólk blíva spent, tí framgongdin innan føroyskan hondbólt hevur verið stór. Men vit mugu ansa eftir, at vit ikki blíva vónbrotin, um vit ikki spæla okkum til eitt endaspæla á hvørjum ári," ávarar hjálparvenjarin. 

EM-endaspælið í 2026 verður leikt í Danmark, Norra og Svøríki, og vertslondini hava fast pláss í endaspælinum. Harumframt hevur verandi meistarin, Frakland, eisini tryggjað sær pláss í kappingini. 

EM24, EM í hondbólti 2024, Føroyar, Slovenia, føroyskir fjepparar

Men lutakastið til EM-undankappingin 21. mars hevur ikki hægstu raðfesting hjá føroyska manslandsliðnum beint nú. Tað hava dystirnir móti Norðurmakedónia, um at koma við til HM. Play-off dystirnir verða spældir úti og heima 8. og 12. mai, og vinnarin sleppur við til HM-endaspælið, sum verður leikt í Danmark, Noreg og Kroatia í januar næsta ár.