Hamas og Fatah ætla at skipa felags palestinska stjórn

Umboð fyri Hamas og Fatah fara at hittast í Moskva at samráðast um at skipa felags palestinska stjórn.

Tað skrivar russiska tíðindastovan, RIA, sambært norska kringvarpinum.

Hamas og Fatah fara eisini at viðgera spurningin um at byggja Gasageiran uppaftur eftir kríggið við Ísrael.

Hamas hevur valdið í Gasa og Fatah, sum er størsti og mest týðandi vongurin í palestinska frælsisfelagsskapinum, PLO, lutvíst valdið á Vestara áarbakka.

Mánadagin kom fram, at palestinski forsætisráðharrin, Mohammad Shtayyeh, og allir hinir ráðharrarnir hava biðið um at verða loystir úr starvi. 

Orsøkin til, at palestinska stjórnin leggur frá sær, er álopini á Gasageiran og ófriðurin á Vestara áarbakka og í Jerusalem.