Eingin vápnahvíld í eygsjón

Vónir vóru um, at tingingarnar í Egyptalandi um vápnahvíld í Gasa fóru at koma á mál leygardagin.

Men seinnapartin leygardagin komu boð um, at ísraelska sendinevndin ikki kom til Kairo á fund sum ætlað. 

Sambært ísraelskum miðlum, er orsøkin, at Hamas ikki hevur játtað at lata Ísrael ein lista við nøvnunum á gíslunum í Gasa, sum framvegis eru á lívi. 

Seta treytir

Hamas hevur kravt, at Ísrael skal lúka ávísar treytir, áðrenn listin verður útflýggjaður.

Umboð fyri Katar og Egyptaland skipa samráðingarnar, og umboð fyri amerikonsku stjórnina hava eisini verið við. 

Talan hevur verið um at loyva neyðhjálp til Gasa, at fleiri hundrað palestinar skulu latast leysir úr fongslum í Ísrael, og ísraelskir gíslar í  Gasa skulu eisini latast leysir.