Kvinnur høvdu 'viltran' seksualitet

Okkara formøður livdu í einum samfelag, sum var skipað eftir patriarkalskum leisti, har forsyrgjandi maðurin var høvdið í familjuni og hann sum ráddi fyri borgum. Hann átti jørðina og ognirnar, og hansara synir arvaðu tað, sum lá eftir hann. Tí var tað sera umráðandi fyri hann, at tey børn, sum komu undan, vóru hansara. Hetta hevði so við sær, at fylgjast skuldi neyvt við kvinnuni, so hon ikki gjørdist við barn við øðrum manni.

Í skjølum, sum Rigmor Dam hevur kannað, sæst, at kvinnur ikki vóru so glaðar fyri at fara til lækna við egnum kvinnuligum heisutrupulleikum so sum undirlívsbruna, men fekk sonurin eitt prus, so vóru tær skjótar avstað við honum.

- Heilsan hjá kvinnum er verri hjá kvinnum enn hjá monnum, og hetta er ein sannroynd i øllum patriarkalskum samfeløgum. Man er skjótari at gøða og grøða dreingjabørn og menn, tí alt samfelagið byggir á, at tú ikki mást missa forsyrgjaran.

Sjálvt um granskingin hjá Rigmor snýr seg um støðuna, sum hon var fyri meira enn 100 árum síðani, so er støðan soleiðis enn í dag, serstakliga har patriarkalska skipanin ger seg galdandi, og hon er sannførd um at leivdir av hesari hugsan enn gera seg galdandi í heilsuverki okkara í dag.