Saknar føroyingar í Stavanger

- Tit hava so nógva vitan og royndir, og tit hava lætt við at skilja tað, onnur arbeiða við, so tað hevði verið fantastiskt, um Føroyar aftur komu við.

Tað sigur stjórin fyri ONS, Leif Johan Sevland, við Orkan.fo, sum hitti hann á einum orkufundi í Oslo herfyri

Hann minnist gott aftur á, tá ið Føroyar plagdu at vera við á messuni við egnum bási, og høvdu sluppina, Westward Ho, liggjandi á havnarlagnum.

Læra av hvørjumøðrum
- Sjálvandi kunnu Føroyar læra nakað av ONS, men ONS kann so sanniliga eisini læra nakað av Føroyum. Tit hava maritima mentan og kenna virðini í at samstarva við náttúruna, sigur Leif Johan Sevland.

Mongu broytingarnar í kjalarvørrinum av grøna orkuskiftinum merkja eisini eina orkumessu sum ONS, nú alsamt meira snýr seg um varandi orkuhættir so sum vind, sól og aldu- og sjóvarfalsorku.

- Alt hetta eigur eisini at vera nakað fyri føroyskar vinnulívsfyritøkur og politikarar at fáa innlit í, og her er ONS ein møguleiki, sigur Leif Johan Sevland.