Trivnaðarkanningin í Sjúkrahúsverkinum verður fíggjað í rakstrinum

Sjúkrahúsverkið setir ikki pengar burturav ítøkiliga til trivnaðarkanningina, sum nú skal gerast. 

Útreiðslurnar vera við í rakstrarútreiðslunum hjá Sjúkrahúsverkinum.

Trivnaðarkanningin í 2022 kostaði 204.400 kr. Øll trý sjúkrahúsini vóru við. 

Eitt ískoyti var gjørt í fjør, - tað kostaði 63.000 kr.  

Tað sigur Margit Stórá, landsstýriskvinna, sum hevur svarað Eiriki í Jákupsstovu, løgtingsmanni, um trivnaðarkanningar hjá Sjúkrahúsverkinum.

Hon sigur, at í visjón 2025 hevur sjúkrahúsleiðslan sett, at trivnaðarkanningar skulu gerast árliga.  

Kanningin verður í heyst

Sjúkrahúsverkið hevur biðið um tilboð um at gera trivnaðarkanning.

Endamálið er at fáa at vita, hvussu tey 1.300 starvsfólkini á teimum trimum sjúkrahúsunum trívast, bæði sálarliga og í arbeiðinum sum heild.

Trivnaðarkanningin, 30 til 40 spurningar, skal vera í heyst. Úrslitini skulu vera tøk í oktober ella november.

Kunngjørt verður 22. mai, hvør fær arbeiðið at gera trivnaðarkanningina í Sjúkrahúsverkinum.