Arbeiðsfólk hjá landi og kommunum fara í verkfall týskvøldið á midnátt

Á midnátt í kvøld fer ein partur av limunum hjá Føroya arbeiðarafelagi, Havnar arbeiðarafelagi, Klaksvíkar arbeiðskvinnufelagi og Klaksvíkar arbeiðsmannafelagi í verkfall.

Verkfall er lýst fyri allar limir hjá hesum feløgum, men ósemja hevur tikið seg upp, um allir limirnir sleppa í verkfall.

Arbeiðarafeløgini siga ja. Men Kommunala arbeiðsgevarafelagið og Lønardeildin hjá landinum siga, at verkfallið er ikki galdandi fyri tey, sum arbeiða hjá kommununum ella hjá landinum.

Jan Mortensen, stjóri á lønardeildini hjá Fíggjarmálaráðnum, vil ikki gera samrøðu við útvarpið, men sigur í stuttari viðmerking, at arbeiðarafeløgini, Kommunala arbeiðsgevarafelagið og Fíggjarmálaráðið hava avtalað at hittast klokkan 13 í dag at tosa um støðuna.

Hann hevur ikki fleiri viðmerkingar fyri henda fundin.

Jan Mortensen, Lønardeildin

Jan Mortensen er leiðari á Lønardeildini í Fíggjarmálaráðnum. (Mynd: Bjarni Árting Rubeksen)

Fingu fráboðan í gjár

Kommunala arbeiðsgevarafelagið og Fíggjarmálaráðið fingu formliga fráboðan um verkfallið hjá arbeiðarafeløgunum seinnapartin í gjár.

Av tí at verkfall skal lýsast 48 tímar frammanundan, fara arbeiðsfólkini hjá kommunum og landinum tí ikki í verkfall fyrr enn týskvøldið á midnátt.

- Hetta er fyri at binda um heilan fingur, sigur Sonja Jógvansdóttir, samskipari hjá Samtaki, sum er eitt samstarv millum fleiri arbeiðarafeløg.

Hoyr innslag í útvarpstíðindunum: 

Havnar arbeiðskvinnufelag samráðist ikki saman við hinum arbeiðarafeløgunum. Í kunngerð í dag sigur Havnar arbeiðskvinnufelag, at í samband við verkfallið noktar felagið limum sínum at taka upp verkfalsrakt arbeiði.