Fer í Fasta gerðarrætt

Fasti gerðarrættur skal gera av, um verkfallið hjá arbeiðarafeløgunum eisini er galdandi fyri kommunurnar og landið.

Jan Mortensen, stjóri á Lønardeildini í Fíggjarmálaráðnum, sigur við Dimmu.fo, at fara fólk hjá landi ella kommunum í verkfall, verður hetta lagt fyri Fasta gerðarrættin sum skundmál. 

Kommunala arbeiðsgevarafelagið og Lønardeildin hjá landinum siga, at verkfallið, sum byrjar á midnátt, er ikki galdandi fyri tey, sum arbeiða hjá kommununum ella hjá landinum.

Jú, tað er eisini fyri tey, siga arbeiðarafeløgini.

Verkfallið er fyri øll arbeiðsøki, siga tey.

Tey seinastu 40 árini hava fýra verkføll verið hjá arbeiðarafeløgunum. 

Tey vóru í 1985, 1987, 2001 og 2003. 

Hesi verkføll fevndu um øll arbeiðsøki hjá privatum, landi og kommunum, vísa arbeiðarafeløgini á.