Óli toppskjútti í Sävehof-finalusigri

Óli Mittún var toppskjútti við átta málum, tá IK Sävehof vann 28-27 á Ystads IF í fyrstu finaluni um svenska meistaraheitið í Partille Arena.

Dysturin var javnur, og støðan í hálvleikinum var 12-12. Eftir steðgin var ongantíð meir enn eitt mál á muni fyrrenn ímóti endanum. Tá eydnaðist heimaliðnum at skjóta trý á rað - tað seinasta av hesum skoraði Óli Mittún - og so var 26-23. 

Tað var nóg mikið til sigurs, og føroyska supertalentið, sum júst er valdur sum besti spælskipari í svensku deildini hetta kappingarárið, og hinir í Sävehof hava  tikið fyrsta fetið ímóti svenska meistaraheitinum.

Onnur finalan verður mikukvøldið, tá Ystads er á heimavølli.