Óli spælir um svenska meistaraheitið

Føroyski hondbóltsspælarin Óli Mittún kann gerast svenskur meistari í dag.

Tað verður hann, um IK Sävehof vinnur í fjórðu finaluni á útivølli ímóti Ystads. Spælt verður upp í tríggjar finalusigrar, og í løtuni er støðan 2-1 til liðið úr Partille.  

Ungi føroyski úrmælingurin hevur spælt sera væl eftir árskiftið. Í finalunum hevur hann verið ímillum teir allarbestu hjá teimum gulu og svørtu.

Higartil hava liðini vunnið sínar heimafinalur, og um tað mynstrið heldur fram, skal ein fimta og avgerandi finala til. Tó er lítil ivi um, at Óli Mittún og teir ætla sær at avgera alt seinnapartin. 

Eydnast tað, ger hann eldra systkinabarninum, Eliasi Ellefsen á Skipagøtu, bragdið eftir. Núverandi Kiel-spælarin vann meistaraheitið við IK Sävehof í 2021.