Arbeiðsgevararnir: Haldið fram sum vanligt

Føroya Arbeiðsgevarafelag hevur í dag biðið sínar limafyritøkur um at útinna alt tað arbeiðið, sum møguligt er í einum verkfalli. Tað skrivar Vinnuhúsið í tíðindaskrivi.

Hetta merkir millum annað, at limafyritøkur ikki skulu góðtaka ólógligar fysiskar blokadur, at tey starvsfólk, sum ikki eru í verkfalli, eru til arbeiðis sum vant, og loysa sínar vanligu uppgávur, í tann mun tað ber til, og at limafyritøkur ikki uttan víðari skulu góðtaka krøv ella treytir, sum arbeiðarafeløgini seta fyri at fáa undantøk frá verkfallinum ella frá blokadum.

”Vit høvdu vónað, at semingsroyndin fór at enda við einari semju, men nú eingin vilji var at samráðast, heldur Føroya Arbeiðsgevarafelag tað vera sína skyldu at viðvirka til, at samfelagið kann virka so vanligt, sum tað ber til í einari verkfalsstøðu,” sigur Niels Winther, stjóri í Føroya Arbeiðsgevarafelagi, í skrivinum.