Ikki ráð at gera súkklukontaktir við bergholini

Í verandi játtan til rakstur er ikki ráð til at gera súkklukontaktir við bergholini.

Tær kosta 150.000 til 200.000 kr. fyri hvørt berghol umframt rakstur og viðlíkahald.

Rakstrarjáttanin eigur tí at hækka, um slíkar tekniskar útbyggingar skulu gerast.

Tað sigur Dennis Holm, landsstýrismaður, í svari til Eirik í Jákupsstovu, løgtingsmann.

Hann spurdi um súkklukontaktir við bergholini norður um Fjall.

Tey, sum eru á súkklu, trýsta á ein knøtt, eina kontakt, við bergholsmunnan.

Ein ávaringarlampa verður tá tendrað við bergholsmunnarnar, so bilførarar vita, at súkkla er í bergholinum. 

Í temablaðnum “Ábær ferðsla” hjá Landsverki verður mælt til at gera eina royndarverkætlan við súkklukontaktum í onkrum bergholi. 

Tílík royndarverkætlan kundi verið gjørd fyri bergholini norður um Fjall, tí tey eru stutt og í teimum er lítil ferðsla, sigur Dennis Holm.