Iran fær hóvligan forseta

Tann hóvligi Masoud Pezeshkian verður nýggjur forseti í Iran.

Í øðrum valumfari fekk Pezeshkian 53,7 prosent av atkvøðunum. Mótvalevnið, tann konservativi Saeed Jalili, fekk 44,3 prosent, skrivar tíðindastovan dpa.

Pezeshkian fór til val uppá millum annað at fáa betri viðurskifti við vesturheimin og at tað ikki longur skal vera eitt krav frá landinum, at kvinnur skulu bera turriklæði.

Men hóast Iran nú fær ein hóvligan forseta, verður ikki roknað við, at tað fer at hava stórar politiskar broytingar við sær. Veruliga valdið í landinum liggur hjá ayatollah Ali Khamenei, sum hevur avgerandi orðið í øllum týðandi málum og eisini er ovasti hjá iranska herinum.