Fleiri vilja vera lærarar

Fleiri umsóknir eru til læraraútbúgvingina í ár enn undanfarin ár.

Í ár vilja 73 gerast lærari, skrivar Skúlablaðið, sum sigur, at tey vóru 52 í fjør og 64 í 2022.

Flestar umsóknir vóru í 2016, tá 91 søktu um at sleppa í læraraútbúgvingina.

Í miðal hava verið slakar 74,5 umsóknir frá 2008 til 2024.

Í 2008, tá læraraútbúgvingin var skipað sum bachelorlestur á Námsvísindadeildini hjá Fróðskaparsetrinum, vóru 76 umsóknir til læraraútbúgvingina.

Hesi 17 árini eru komnar 1203 umsóknir til læraraútbúgvingina, skrivar Skúlablaðið.