Heitt kelduvatn skal hita Glyvra skúla

Heita vatnið, sum var funnið við Glyvra skúla stutt fyri jól í 2022, skal nú brúkast til at hita Glyvra skúla.

Boringar hjá Jarðfeingi og Runavíkar kommuna raktu við eina keldu, har vatnið var 23 stig, á leið har sum Glyvra bio var.

Eftir hálvtannað ár er nú staðfest, at hitin í kelduni er tann sami, og hann skal brúkast til at hita Glyvra skúla.

Metingin er, at keldan megnar at hita verandi skúla og eina ætlaða útbygging og væl tað, sigur Runavíkar kommuna.

Jarðfeingi og Vinnumálaráðið stuðla

Arbeiðið at gera eina hitaskipan var boðið út.

Lægsta boðið eigur felagið Zacharis Leitisstein, - tað er ein millión og slakar 385.000 krónur.

Jarðfeingi og Uttanríkis- og Vinnumálaráðið stuðla ætlanini.

Hesi seinastu sjey árini hevur Glyvra skúli brúkt í miðal 45.123 litrar av olju til upphiting. 

Miðalkostnaðurin um árið er 238.024 kr.