Russland og Ukraina býta um krígsfangar

Russland og Ukraina ætla at býta um krígsfangar í dag.

Talan er um 90 fangar, skrivar Bloomberg, og vísir til eitt fólk, sum veit um málið.

Fangabýtið kemur í kjalarvørrinum á eini avtalu, sum Sameindu arabisku emiratini hava fingið í lag.

Reuters, sum endurgevur Bloomberg, hevur ikki fingið óhefta váttan um upplýsingarnar og hevur heldur ikki fingið svar frá russiskum og ukrainskum umboðum.

Í síðstu viku skrivaðu ukrainskir miðlar, at mannarættindakommisserurin í landinum, Dmytro Lubinets, sigur, at stjórnin, við hjálp frá Emiratunum, fyrireikaði størri fangabýti um stutta tíð.

Fá fangabýti hava verið millum londini bæði í krígnum, nú skjótt hálvt triðja ár er liðið, síðani Russland leyp á Ukraina.

Seinasta býtið var í juni. 

Eisini tá skipaðu Emiratini fyri, og Russland og Ukraina útflýggjaðu tá 90 krígsfangar hvør.