Atli Gregersen: Vesturheimurin má ganga undan fyri at minka um CO2-útlátið

Fyri nøkrum árum síðani gavst Hiddenfjord at flyta laks við flogfari fyri at gera framleiðsluna hjá fyritøkuni grønari. 

Seinnu árini hevur fyritøkan eisini lagt seg eftir at brúka framleiðslubygningarnar til at útvinna streym úr sólorku. 

Hiddenfjord hevur snøgt sagt tikið Føroya størstu sólorkulund í nýtslu, tí felagið hevur lagt sólpanelir á tekjurnar á tveimum bygningum á smoltstøðini á Fútakletti, á landstøðini hjá Hiddenfjord á havnalagnum í Miðvági, og eftir summarfrítíðina verður farið undir at seta upp næsta sólorkuverkið á smoltstøðini á Fútakletti. 

Við hesum annlegginum fer samlaði framleiðslumátturin úr sólorku hjá Hiddenfjord uppum 1 MW. Tá framleiðir felagið orku svarandi til 140 húsarhald.

Atli Gregersen, stjóri, staðfestir, at tað er umráðandi, at vit í Vesturheiminum taka ábyrgd og ganga undan fyri at minka um CO2-útlátið. Fyrst og fremst tí, at tað eru vit í Vesturheiminum, ið standa fyri størsta útlátinum, men eisini tí, at vit hava ráð at gera nakað við útlátið.