Funnið ábendingar um lív á Mars

"Is there life on Mars? spurdi David Bowie í sangi við sama navni á plátuni "Hunky Dory" frá 1973. 

Nú 51 ár seinni kann føroyingurin David Arge Klevang, ið er lektari og granskari á DTU Space, svara spurninginum hjá hinum David.

"Jú, hetta líkist ongum øðrum, vit hava sæð fyrr á Mars, og tað gevur ábendingar um, at lívfrøðiligar smáverur - ella mikroorganismur - einaferð hava livað á Mars."

NASA-rovarin Perseverance hevur, við hjálp frá útgerð, sum er ment av David Arge Klevang og hinum á DTU Space, funnið ein stein, ið gevur ábendingar um, at lívfrøðiligt lív einaferð hevur verið á Mars.

Um Mars 2020-sendiferðina

Perseverance, NASA, Mars 2020

Verkætlanin Mars 2020, sum Perseverance-rovarin er partur av, er ein av størru sendiferðunum hjá NASA, tí hon hevur kostað yvir 16 milliardir krónur. 

Perseverance-rovarin bleiv sendur avstað til Mars 30. juli 2020, og hann lendi trygt á Mars 18. februar 2021. Rovarin hevur sosatt verið virkin á Mars í hálvt fjórða ár. 

Einans helvtin av royndunum at lenda eitt rúmdarfar á Mars hava eydnast. 

Málið við 2020-sendiferðini er at finna útav, um tað eru tekin um, at lív einaferð hevur verið á Mars. 

Perseverance goymir teir mest áhugaverdu steinarnar, hann finnur, og leggur teir í eitt rør, sum seinni verður flogið aftur til Jørðina, so at steinarnir kunnu granskast við tólum, ið eru ov stór at senda til Mars. 

NASA hevur tó sátt iva um, nær heimferðin hjá steinunum, Mars Sample Return, verður. Upprunaliga var ætlanin, at tað skuldi kosta 75 milliardir krónur, men tað er ov kostanaðarmikið. Tí verður arbeitt við einari aðarari og bíligari sendiferð, fyri at fáa hendur á Mars-steinunum, men tað verður í fyrsta lagi einaferð í 2030'unum. Evropiski rúmdarstovnurin, ESA, er eisini partur av sendiferðini at fáa Mars-steinarnar heim aftur.