USA fer at senda Ukraina vápn

Amerikanski forsetin, Donald Trump, segði á tíðindafundi í dag, at nú er avtala gjørd um at senda vápn til Ukraina umvegis NATO.

Forsetin sigur, at USA hevur bestu hernaðarútgerð í heiminum, og at henda útgerð verður í næstum send til Ukraina.

Á tíðindafundinum hótti Trump eisini Russland við hægri tolli, um eingin avtala er um at steðga krígnum í Ukraina innan 50 dagar. Hetta hevði við sær, at virðisbrøvini á gjaldsskálanum í Moskva hækkaðu, tí har høvdu tey væntað nógv harðari tiltøk her og nú.

NATO-aðalskrivarin, Mark Rutte, var eisini við á tíðindafundinum. 

Hann segði, at hendan avtalan er nakað "sera stórt", og at evropeisk lond nú vísa ábyrgd. NATO fer í næstum at "flyta útgerð skjótt" til Ukraina.

- Hetta er fyrsta bylgjan, og fleiri fara at koma, segði Mark Rutte.

Trump segði longu fyrr í dag, at USA fer at senda rakettir til loftverjuskipanina Patriot til Ukraina - fyri rokningina hjá ES. Harumframt verða álopsvápn eisini send Ukraina, uttan at tað er upplýst, hvørji vápn talan er um.