Knút og Kári vunnu NM-silvur

Sostatt fingu Knút og hestur hansara staðfest, at tað ikki var av tilvild, at teimum fyri tveimum árum síðan eydnaðist at vinna gull í somu kapping, sum tá var í Álandi.

- Tað var fantastiskt at vinna silvur og at hava einar 70 føroyskar fjepparar, ið róptu, stuðlaðu og hoyrdust fram um øll hini, sigur Knút Lützen, sum er sera fegin um, at tað aftur í ár eydnaðist at vinna heiðursmerki.

At verja eitt gullmerki verður ofta hildið at vera torførari enn at vinna eitt, og Knút heldur eisini, at meira trýst var á hesa ferð.

- Fyri tveimum árum síðani kendi eingin okkum, so tá trivust vit væl í leiklutinum undir radaranum. Men hesa ferð merktist væl, at munandi meira trýst var á, sigur hann.

Hevur vakt ans
Innleiðandi bendi alt á harða kapping millum frægastu ross og reiðfólk í Norðurlondum, men við einum fjórðaplássi eydnaðist Knúti og Kára at vinna seg í finaluna.

Byrjanin í finaluni var einki serlig, men ein góður endaspurtur gjørdi munin, og tað var eisini tað, Knút hevði væntað sær av hesti sínum.

- At tað bleiv til gull í Álandi fyri tveimum árum síðani, er nakað, ið nú veruliga sæst aftur í føroysku ríðingini, men eisini onnur geva sær far um, at føroyingar kunnu vera við, har sum tað er stuttligt, sigur Knút Lützen.

Hann og hestur hansara, Kári frá Ásbrú, koma heim aftur við Norrönu mikudagin.

Hoyr samrøðu við Knút Lützen her: