Minni av toskayngli á landgrunninum

Tað er minni av toskayngli á landgrunninum í ár, enn tað hevur verið seinastu tvey árini.

Tað vísa yngul- og ætikanningarnar, sum vórðu gjørdar við Jákup Sverra í seinnu helvt av juni.

Havstovan skrivar, at um hugt verður eftir øllum tíðarskeiðnum frá 1983 til 2024, eru nøgdirnar undir miðal fyri tosk, nebbasild og hvítingsbróður, men yvir miðal fyri hýsu.

Ymiskar nøgdir á ymsum økjum

Stórur munur var á nøgdini í ymsu økjunum.

Størstu nøgdirnar av yngli vóru vestanfyri og í útnyrðingspartinum av Landgrunninum.

Hinvegin, so var nógv av plantuæti á Landgrunnnum. 

Yvir miðal á Føroyabanka

Á Føroyabanka vóru nøgdirnar av toskayngli í fjør methøgar. Væl minni av toskayngli er at fáa í ár, men tó eru nøgdirnar yvir miðal, tá hugt verður eftir øllum tíðarskeiðnum frá 1991 til 2024.

Nøgdirnar av hýsuyngli eru væl yvir miðal, meðan lítið er av nebbasildayngli á Føroyabanka.

Lítið var av plantuæti á Bankanum og nøgdirnar vóru bæði smærri enn á Landgrunninum og í havøkinum rundan um Bankan, skrivar Havstovan.