Apukoppar staðfestir í Svøríki

Fyrsti tilburðurin av nýggja frábrigdinum av Mpox-virusinum - tað, sum eisini verður kallað apukoppar - er nú staðfest í Svøríki.

Hetta er fyrsti staðfesti tilburður uttanfyri Afrika.

Olivia Wigzell, stjóri í svenska fólkaheilsumyndugleikanum, sigur sambært SVT, at sjúki persónurin hevur verið í Afrika og er smittaður har. Hon sigur, at tað ikki er nakar serligur vandi av, at ein persónur í landinum nú hevur mpox.

Nýggja frábrigdið av mpox, sum er serliga útbreitt í Demokratiska lýðveldinum Kongo og øðrum londum í Afrika, verður roknað sum meira smittuberandi og deyðiligt enn frábrigdið, sum var í 2022.

Heimsheilsustovnurin WHO hevur lýst seinasta útbrotið av mpox sum eina globala hóttan.

Mpox, Apukoppar, Svøríki

Olivia Wigzell, stjóri í svenska fólkaheilsumyndugleikanum, mitt fyri (Mynd: Ritzau / Scanpix)