Hákun og Füchse Berlin royna seg í Champions League

Hondbóltsvongurin, Hákun West av Teigum, kann fáa sín fyrsta dyst í Champions League í kvøld, tá Füchse Berlin spælir í glæsiligastu EHF-kappingini fyri fyrstu ferð í 11 ár

Hákun West av Teigum í hornatøkum við norðurmakedónsku verjuna í play-off dysti fyrr í ár

Mynd: Bjarni Árting Rubeksen

Símun Christian Olsen

12.09.2024 - 12:39

Føroyski landsliðsspælarin, Hákun West av Teigum, kann í kvøld fáa sín fyrsta dyst í Champions League.

Füchse Berlin, sum endaði á 2. plássi í týsku landskappingini síðsta kappingarár, skal spæla í glæsiligastu EHF-kappingini fyri fyrst ferð í 11 ár, tá ungarska meistaraliðið, Vezprém, vitjar í Max-Schmeling-leikhøllini í kvøld.

Væntast kann, at dysturin verður javnur. Vezprém hevur spælt Champions League-finalu fýra ferðir - seinast í 2019 - men tað hevur ikki eydnast hjá ungarunum at vinna kappingina enn.

Í fjør spældi Füchse Berlin seg í European League-finaluna, har revarnir tó taptu fyri Flensburg-Handewitt, sum hevði Jóhan á Plógv Hansen á liðnum.

Hákun West av Teigum sat nógv á beinkinum í fjør. Danski veteranurin, Hans Lindberg, spældi fyri tað mesta, men hann fór aftur til Danmarkar í summar. Í ár eitur kappingarneytin hjá føroyska vonginum Tobias Reichmann.