Asfaltgoymsla krevur onga umhvørvisgóðkenning

Asfaltsgoymslan, bitumengoymslan, hjá Landsverki í Hósvík krevur onga umhvørvisgóðkenning.

Tí hon er bygd, áðrenn lógin um umhvørvisgóðkenning kom í 1988.

Goymslan í Hósvík er frá 1977. Seinasti tangin er frá 1985. 

Hóast goymslan ikki hevur umhvørvisgóðkenning, hevur Umhvørvisstovan eftirlit við henni.

Tað sigur Dennis Holm, landsstýrismaður, sum hevur svarað Kim Durhuus, løgtingsmanni, sum spurdi um asfaltsgoymsluna í Hósvík.   

Frættu um ampa

Tá goymslan í Hósvík fekk bitumen í vár, frætti Landsverk um ampa av lukti, sigur landsstýrismaðurin. 

Landsverk ætlar tí at gera tillagingar í komandi útbjóðingartilfari, har størri krøv verða sett til umhvørvisspurningin.

Um hetta átakið riggar, fer tað vónandi at minka um luktin frá bitumenveitingini við skipi, og tá asfaltið verður lagt út, sigur Dennis Holm.

Millum annað ætlar Landsverk at seta filtur á bitumentangarnar.

Hann sigur, at Landsverk viðger árliga, hvørji umhvørvisátøk skulu gerast.