Høgni stríddi seg til remis í maratontalvi

Føroyar taptu greitt ímóti Slovenia í gjár á talvolympiaduni, sum er í Budapast í hesum døgum.

Úrslitið var ½ - 3½ til slovenar, sum á sínum fremru borðum høvdu tveir sterkar russiskar stórmeistarar, ið eru flýddir undan Vladimir Putin, skrivar Talvsamband Føroya.

Helgi Dam Ziska telvaði væl á 1. borði, men himpraðist, tá ið á stóð, og tað bøtti hann fyri stutt eftir. Rógvi Egilstoft og John Rødgaard taptu skjótt.

Dagins talvi stóð Høgni Egilstoft Nielsen fyri. Hann stríddist við rygginum ímóti múrinum ímóti russiskum stórmeistara í samfullar átta tímar, og mótstøðumaðurin tók ikki remis, fyrrenn bert kongarnir stóðu eftir á borðinum, og eingin annar telvari var eftir í salinum.

Føroyar eru nú nummar 78 í røðini av teimum 187 londunum í kappingini. Í dag er frídagur í Budapest - einasti hvílidagurin í kappingini - og í sjeynda umfari mikudagin telva Føroyar móti Suðurkorea. Tað verður fyrsti talvlandsdysturin landanna millum. Roknast kann við einum jøvnum dysti.

Føroyar (66)  -  Slovenia (26)  ½ - 3½

GM Helgi Dam Ziska (2553)  -  GM Vladimir Fedoseev (2692)  0 - 1

Høgni Egilstoft Nielsen (2379)  - GM Anton Demchenko (2597)  ½ - ½

Rógvi Egilstoft (2278)  -  GM Matej Sebenik (2515)  0 - 1

IM John Rødgaard (2273)  -  Matic Lavrencic (2360) 0 - 1