Løgtingið fekk fýra fráboðanir frá umboðsmanninum

Løgtingið fekk fýra fráboðanir frá Løgtingsins umboðsmanni í fjør.

Umboðsmaðurin skal boða løgtinginum frá álvarsligum mistøkum ella vansketni og lýtum í lógum, fyriskipanum ella umsitingarligum avgerðum.

Løgtingið fer í dag at viðgera ársfrágreiðinga hjá umboðsmanninum fyri 2023.

Formansskapurin hevur uppskot til samtyktar um at góðkenna ársfrágreiðingina.  

Tey fýra málini, løgtingið fekk í fjør, eru um lýti í serskúlalógini, broyting í byggisamtykt, handfaring av umsókn um byggiloyvi, og um handfaringina av innlitsáheitan frá fjølmiðli umframt klagumálsupplýsingina um hetta málið.

Trý onnur mál eru á skránni hjá løgtinginum í dag.

Fólkaflokkurin eigur tvey. Annað er at leingja gildistíðina á rættindum í fiskivinnuni. Hitt er um at javna landsskattastigan árliga.

Jacob Vestergaard hevur uppskot um harðari revsing fyri rúsevnakoyring.

Tingfundurin í dag er kl.11.