Varðhaldsfongslingin av Paul Watson enn einaferð longd

Ákæruvaldið í Grønlandi vil framvegis hava Paul Watson varðhaldsfongslaðan, hóast tað kom fram undir rættarfundinum í morgun, at kanningin hjá Grønlands Politi í málinum er liðug, skrivar Sermitsiaq.

Verjin fanst hvassliga at rættinum, sum enn einaferð hevur longt varðhaldsfongslingina hjá Paul Watson.

Verjin slapp heldur ikki at leggja bevísir fram, sum, sambært verjanum, vísir, at Paul Watson ikki hevur sett lív og heilsu í vanda hjá japanskum hvalaveiðumonnum.

Men dómarin noktaði hesum, og valdi at leingja varðhaldsfongslingina fram til 23. oktober.

Sambært Sermitsiaq, so fer verjin aftur at kæra úrskurðin til Landsrættin í Grønlandi.

Paul Watson hevur verið í varðhaldi í Nuuk síðan 21. juli, tá hann varð handtikin av Grønlands Politi.

Japan vil hava Danmark at útflýggja hann.