Inntøkurnar í Føroyum eru javnari enn í grannalondunum

Ójavnin í inntøkunum hjá fólki í Føroyum er minni enn í grannalondunum.

Ginitalið verður brúkt fyri at lýsa árliga inntøkubýtið í einum landi og kann forklárast soleiðis, at jú tættari talið er null, javnari eru inntøkurnar í samfelagnum býttar. 

Í Føroyum var ginitalið 22,2 í 2022. Tað var 21,5 í 2021.

Ginitalið 22,2 sigur, at minni ójavni er í Føroyum enn í nógvum øðrum londum.

Í Danmark er ginitalið 28 og í ES er ginitalið 30. 

Í Grønlandi er ginitalð 35. Í Noregi og Svøríki er ginitalið 28. 

Tí eru inntøkurnar hjá húskjum í Føroyum javnari býttar enn í londunum, sum vit vanliga sammeta okkum við, skrivar Hagstovan.

Eitt annað, sum verður brúkt til at lýsa inntøkubýtið, eitur fimtingslutfall.

Í Føroyum hevur ovasti fimtingurin tríggjar ferðir størri inntøku enn tann niðasti.

Í 2021 var inntøkan 2,9 ferðir størri.