Fiskamarknaðurin: Vænta ikki nógvan útróður

Fiskamarknaðurin væntar ikki nógvan útróður í vikuni.

Streymurin kann brúkast, men veðurvánirnar eru ikki góðar fyrst í vikuni, men batna sum vikan líður.

Eitt ísfiskalínuskip er við Føroyar. Tað fiskar hýsu fyri tað mesta og nakað av toski. Hitt ísfiskalínuskipið liggur.  

Fimm frystilínuskip eru við Føroyar, eitt er við Ísland, eitt í NEAFC-øki, eitt er við Grønland og eitt er á Flemish Kap. 

Tey fiska tosk, longu, brosmu og svartkalva.  

Trolarar í bretskum sjógvi

Tríggir ísfiskatrolarar fiska svartkalva í bretskum sjógvi. 

Har er eisini ein frystitrolari, og ein er við Eysturgrønland.

Øll pørini eru úti. Tey fiska mest upsa og nakað av hvítum fiski. 

Fiskaríið hjá teimum er misjavnt. 

Tvey pør fiska gulllaks.  

Allir trolbátarnir liggja.

Tvey garnaskip fiska svartkalva og eitt fiskar havtasku. Fiskaríið hjá teimum er brúkiligt, sigur Fiskamarknaðurin.