Spreinging við flogverksmiðju í Turkalandi

Ein spreinging var seinnapartin við bygningin hjá flog- og verjuídnaðinum í turkiska høvuðsstaðnum Ankara.

Turkiski innanríkisráðharrin, Ali Yerlikaya, upplýsir, at fleiri hava latið lív ella eru særd.

Hann skrivar á miðlinum X, at spreingingin líkist einari yvirgangsatsókn.

Tað er ikki greitt, hvussu nógv eru deyð ella eru særd. 

Spreingingin var við høvuðsskrivstovuna hjá flog- og verjuídnaðinum, umleið 40 kilometrar uttan fyri Ankara.

Almenna turkiska tíðindastovan skrivar, at bjargingarlið eru farin á staðið.

Reuters skrivar, at talan er um týdningarmestu fyritøkuna, tá ið ræður um verju og loftferðslu í Turkalandi.

Verksmiðjan ger m.a. stríðsflogfør.