Av hægstu tindum niður í djúpstu dalar og uppaftur

- Eg havi einaferð verið í viðgerð fyri tunglyndi, eftir at eg føldi, at fólk, sum eg stólaði uppá, vóru farin annan veg og slíkt. Og tá lærdi eg, at tá tú skalt taka stórar avgerðir, so skalt tú taka eina í senn.

Høgni Hoydal var erligur og eyðmjúkur, tá ið hann tosaði um sína politisku leið og tað, sum hon hevur havt við sær. At fáa tunglyndi lærdi hann nógv.

- Tað var løgið. Eg misti knappliga alla orkuna og fór niður í djypstu dalar. Men aftur har var tað Hildur og vinfólk, sum hjálptu mær og bóðu meg fáa mær hjálp, og tað fekk eg. Tað hjálpti mær øgiliga væl. Eg kláraði at síggja út um ta støðuna, eg var í. Og eg fekk nøkur amboð at takkla tað. Tað lærdi meg eisini nógv um, hvat nógv fólk fara ígjøgnum og dragast við.

Høgni Hoydal hevur verið á hægstu tindum og í djúpstu dalum, tey 26 árini, hann hevur verið í politikki. Hann fekk yvir 1500 atkvøður bara í Suðurstreymoy, tá hann kom buldrandi inn í føroyskan politikk. Fullveldi kom á skrá, og restin er søga, men hann er sannførdur um, at vit hava ongantíð verið meira sjálvstøðug enn nú, og at stríðið hevur gjørt mun.

Høgni Hoydal er framvegis landsstýrismaður, men er neyðugt at hann leggur tann sessin frá sær, ger hann tað. Og enn hevur hann ikki tikið støðu til, um hann stillar uppaftur á næsta løgtingsvali. 

- Eg hava lært at taka eina stóra avgerð í senn.

Hoyr samrøðuna við Høgna Hoydal, har vit eisini práta við politiska mótstøðumannin, konuna og sonin um hansara 24 ár sum formaður í Tjóðveldi.