Andstøðan hevur ikki tol at bíða eftir kanslaranum

Andstøðuleiðarin í Týsklandi hevur ongan hug at bíða til hálvan januar til at finna útav, um samveldistingið framvegis hevur álit á kanslaranum, Olaf Scholz.

Stjórnin hjá Scholz hevur mist meirilutan, eftir at fíggjarmálaráðharrin og floksleiðarin í FDP, Christian Lindner, er koyrdur frá, og Lindner síðani tók stuðulin til stjórnina aftur.

Tann støðan fekk Scholz til at boða frá, at samveldistingið skal atkvøða, um tað hevur álit á sær sum kanslara 15. januar. 

Men Friedrich Merz, formaður í andstøðuflokkinum CDU, heldur onga orsøk vera til at bíða so leingi.

Olaf Scholz og Joe Biden - Mynd Ritzau Scanpix

Stjórnin hjá Olad Schoilz, samveldiskanslara, hevur mist meirilutan í samveldistinginum. 

Vil hava atkvøðugreiðslu í næstu viku

Á tíðindafundi í gjár boðaði Merz frá, at hann vil hava atkvøðugreiðsluna á skrá longu í næstu viku.

- Vit hava snøgt sagt ikki ráð til at hava eina stjórn uttan meiriluta aftan fyri seg sitandi í fleiri mánaðir, fyri síðani at hava eitt valstríð, val og samgongusamráðingar í vikur, segði Friedrich Merz á tíðindafundinum.

CDU-flokkurin hjá Friedrich Merz hevur vaksandi undirtøku millum týska fólkið, samstundis sum misnøgdin við stjónina hjá Olaf Scholz er metstór.

Nógvir eygleiðarar rokna við, at Merz verður næsti samveldiskanslari í Týsklandi.