Alment innlit ikki við í tunnilslóg

Almenna partafelagið Suðuroyartunnilin verður ikki fevnt av lógini um alment innlit. Tað er greitt, nú lógaruppskotið um Suðuroyartunnil er alment og sent til hoyringar.

Lógaruppskotið hevur ikki ásetingar um, at P/F Suðuroyartunnilin er fevnt av innlitslógini og fyrisitingarlógini. Og tað verður eisini staðfest í viðmerkingunum til uppskotið.

Almennu partafeløgini - tað veri seg Atlantsflog, Vága Floghavn, Føroya Tele og Posta - eru ikki fevnd av lógini um alment innlit. Men tá lógaruppskotið um Visit Faroe Islands varð orðað, afturi í 2014, var ásett beinleiðis í grein-6 í lógini fyri Visit Faroe Islands, at løgtingslóg um innlit í fyrisitingina er galdandi fyri felagið.

Tann leisturin - at tryggja innlit beinleiðis í lógini fyri eitt alment partafelag - er ikki brúktur síðani. Og verður tað eftir øllum at døma heldur ikki hesaferð.

Aksel V. Johannesen lovar tó, at almenna partafelagið kortini skal vera fevnt av almennum innliti. Tað skal bara gerast við eini kunngerð í staðin fyri at seta tað beinleiðis í lógina, sigur løgmaður.

Hoyr samrøðu við Aksel V. Johannesen her: