Næmingar í Eysturkommunu framvegis til Fuglafjarðar í skúla

Eysturkommuna heldur fram við skúlasamstarvinum við Fuglafjørð um framhaldsdeild. Tað samtykti eitt einmælt býráð í Eysturkommunu á fundi í gjár, tá býráðið skuldi taka støðu til eina ískoytisavtalu, sum kemur afturat galdandi sáttmála millum kommunurnar.

Elstu fólkaskúlanæmingarnir í Eysturkommunu ganga í skúla í Fuglafirði, og stóri knúturin í skúlasamstarvinum millum kommunurnar hevur verið tann íløgan, sum skal gerast í skúlabygningin í í Fuglafirði. Tað er nú endað við, at Eysturkommuna rindar ein munandi minni part av íløguni enn upprunaliga ætlað. Sambært ískoytisavtaluni bindur Eysturkommuna seg til at rinda í mesta lagi 12 milliónir krónur av íløguni í at umvæla og dagføra hølini til framhaldsdeildina, sum húsast í tí partinum av skúlanum í Fuglafirði, sum er frá 1964.

Í ískoytisavtaluni stendur eisini, at annar parturin - tað vil siga Eysturkommuna ella Fuglafjarðar kommuna - kann siga upp avtaluna, í fyrsta lagi 1. august 2028. Uppsagnartíðin er tá trý ár, tvs at skúlasamstarvið í øllum føri heldur fram til 1. august 2031. Sjálv ískoytisavtalan er annars galdandi til 2035.

Hoyr samrøðu við Per Martin Gregersen, borgarstjóra í Eysturkommunu: