Leita enn eftir saknaðum

Framvegis eru bjargingarfólk og hermenn til staðar í spanska Valencia-landspartinum, har ógvislig vatnflóð herjaði fyri 12 døgum síðani.

Vónir eru ikki longur um at finna fleiri av teimum saknaðu á lívi, men leitingararbeiðið heldur fram, samstundis sum eitt størri uppruddingararbeiði er í gongd.

Spanska avísin El Pais skrivar, at 8.500 hermenn eru við í arbeiðinum saman við 3.000 sløkkiliðsfólkum og 10.000 politistum.

Hartil kemur, at spanska løgmálaráðið hevur sett á stovn 12 bráðfeingis skrivstovur í raktu kommununum, har fólk um dagin kunnu leita sær hjálp.