Knútapunktið í Vági er borgarstjórasessurin

Á middegi hittast tey níggju, sum vóru vald í býráðið í Vági, til samráðingar.

Tey sótu annars til beint eftir midnátt. Sum skilst er knútapunktið borgarstjórasessurin. 

Arni D. Brattaberg, sum fekk næstflestar atkvøður á býráðsvalinum í gjár, sigur, at avtalað er at samráðast aftur á middegi í dag.

- Tá vit skiltust í nátt, tóku vit í hondina hvør á øðrum og avtalaðu, at einki meira skuldi gerast fyrr enn á middegi í dag. Somuleiðis samdust vit um, at eingin undirhondsavtala skuldi gerast, sigur Arni D. Brattaberg.

Levi Mørk fleiri atkvøður enn borgarstjórin

Javnaðarflokkurin hevði framgongd á valinum í gjár, men har hendi tað, at Levi Mørk fekk fleiri atkvøður enn sitandi borgarstjórin. 

Levi Mørk fekk 131 atkvøður og gjørdist toppskorari á valinum. Bjarni Johansen fekk 108 atkvøður.

Tey, sum eru vald í býráðið í Vági, eru Arni D. Brattaberg, Bárður G. Nielsen, Rógvi Kærbech og Jónleyg Olivia Finnsdóttir fyri Tjóðveldi, Levi Mørk, Bjarni Johansen og Rakul í Lágabø fyri Javnaðarflokkin og Marin Gaardlykke og Erhard Joensen fyri Sambandsflokkin.

Kringvarpið hevur roynt at fáa viðmerking frá umboðum fyri hinar flokkarnar, men eingin tekur telefonina.