Kostaði 52.500 krónur at hjálpa landsstýriskvinnuni

Tað kostaði Umhvørvismálaráðnum 52.500 krónur, íroknað meirvirðisgjald, at fáa ein uttanhýsis advokat at hjálpa landsstýriskvinnuni, Ingilín D. Strøm, at svara landsstýrismálanevndini.

Tað var í sambandi við kæru um embætisførslu hennara - nevndin var biðin um at kanna, um landsstýriskvinnan hevði givið løgtinginum skeivar upplýsingar um fíggjarligu støðuna hjá Bústøðum.

Sambært rokningini frá Annfinni V. Hansen hjálpti hann aðalráðnum við at gjøgnumganga tilfarið í málinum. Hann hevði fundir við aðalráðið, og skrivaði eisini eitt notat fyri landsstýriskvinnuna.

Anfinn V. Hansen

Anfinn V. Hansen, advokatur. 

Svarskriv

7. oktober læt Ingilín D. Strøm landsstýrismálanevndini svarskriv til fyribils niðurstøðuna hjá nevndini.

Í ummælisskrivinum mæltu landsstýriskvinnan og advokatur hennara, Anfinn Vitalis Hansen, til at seta ein kanningarstjóra. Men bara tríggjar dagar seinni kom løgtingsstjórin, Johnhard Klettheyggj, við notati til landsstýrismálanevndina, har hann segði, at tað var ikki neyðugt við kanningarstjóra.

Málið endaði sum kunnugt við, at misálit varð reist móti Ingilín D. Strøm. Og 24. oktober, sama dag sum misálitið var viðgjørt í løgtinginum, og greitt var, at meiriluti var fyri tí, valdi landsstýriskvinnan sjálv at leggja frá sær.