Føroyskir svimjarar gjørdu bart í norðurlandakapping

Seks heiðursmerki og fleiri føroysk met eru við í kuffertinum hjá føroysku svimjarunum, sum hava kappast í norðurlandakappingum í Vejle um vikuskiftið.

Millum tær bestu NM/NJM-stevnurnar fyri Føroyar yvirhøvur, skrivar formaðurin í Svimjisambandi Føroya, Rókur í Jákupsstovu á svimjing.com.

Millum annað vann Isak Brisenfeldt úr Havnar Svimjifelag NM-gull í 200 metra firvaldssvimjing og setti samstundis føroyskt met við at vera hin fyrst undir tveimum minuttum. Nýggja metið er 1:59.39.

Líggjas Joensen úr Ægi vann gull fyri juniorar í 400 metra frísvimjing við tíðini 3:50.73, og Bartal E. Eidesgaard (HS) gjørdist fyrsti føroyingurin, sum svam undir 50 sekund í 100 metur frí. Hjá Leu O. Højsted (Ægir) heldur framgongdin fram. Hon setti føroyskt met í bæði 100 og 200 metur bringu.

Sí úrslitini her:

Vit skulu heilt aftur til 2007 fyri at finna nakað, sum líkist hesari kappingini, skrivar formaðurin í SSF.

  - Tað sum minnir mest um, var NJM 2007, har Pál Joensen (1990, SuSvim) vann gull í 200, 400 og 1500 frí, og Kári J. á Høvdanum (1990, Ægir) silvur í 50 rygg og bronsu í 100 rygg, skrivar svimjing.com