Landskassin fær 30 milliónir minni enn væntað næsta ár

Fíggjarnevndin hevur fingið dagførdar inntøkumetingar frá Fíggjarmálaráðnum

Landsskatturin verður tann sami sum mett, men inntøkurnar frá meirvirðisgjaldi verða 15 milliónir minni enn á fíggjarlógaruppskotinum.

Mynd: Bjarni Árting Rubeksen

Johnsigurd Johannesen

05.12.2024 - 15:41

Fíggjarmálaráðið væntar, at inntøkurnar hjá landskassanum næsta ár vera 30 milliónir kr. minni, enn roknað var við í fíggjarlógaruppskotinum, sum var lagt fram í heyst.

Fíggjarnevndin, sum viðger fíggjarlógaruppskotið, hevur fingið dagførda inntøkumeting frá Fíggjarmálaráðnum.

Roknað verður við, at landsskattturin verður tann sami, sum mett er í fíggjarlógaruppskotinum, tvær milliardir og 140 milliónir, men inntøkurnar frá meirvirðisgjaldið vera 15 milliónir minni enn mett í fíggjarlógaruppskotinum, ella tvær milliardir og 180 milliónir kr.

Inntøkumeting fyri 2025

Kapitalvinningsskatturin verður eisini 15 milliónir minni enn mett, og inntøkurnar frá brennioljugjaldi vera 10 milliónir minni enn mett í fíggjarlógaruppskotinum.

Tilfeingisinntøkurnar vera sjey milliónir minni enn í uppskotinum um fíggjarlóg.

Hinvegin verður roknað við, at inntøkurnar frá útluting úr partafeløgum og grunnum verða 27 milliónir kr. størri enn mett í fíggjarlógaruppskotinum.

Les skrivið frá Fíggjarmálaráðnum um inntøkumetingina her.