Kúvending í Vágs Býráð

Tað gongur skjótt fyri seg í nývalda býráðnum í Vági, sum tekur við á nýggjárinum. Undan býráðsfundinum klokkan sjey í kvøld bendi alt á, at Arni D. Brattaberg, fyrstvaldur á lista-E, fór at gerast borgarstjóri 1. januar. Tað váttar hann sjálvur.

-Jú, tað er rætt, at hálvan tíma undan skipanarfundinum í kvøld høvdu vit í Tjóðveldi eina avtalu við Bjarna Johansen. Sambært avtaluni skuldi eg gerast borgarstjóri og Bjarni Johansen varaborgarstjóri, sigur Arni D. Brattaberg.

Men á fundinum í kvøld vendi alt brádliga á høvdið.

Nú var nýggjur meiriluti skipaður, uttan um Tjóðveldi.

Á fundinum varð Bjarni Johansen skotin upp sum nýggjur borgarstjóri í Vágs Kommunu. Tey tvey umboðini hjá Sambandsflokkinum og tey tvey umboðini hjá Javnaðarflokkinum atkvøddu fyri honum sum borgarstjóra, og hesi fimm hava nú skipað nýggjan býráðsmeiriluta í Vági. Í somu semju, har sitandi borgarstjóri í Vági heldur fram í sessinum næstu fýra árini, er Levi Mørk valdur til varaborgarstjóra.

-Eg má bara staðfesta, at Tjóðveldi er endað í minniluta, sigur Arni D. Brattaberg við Kringvarpið í kvøld.

Bjarni Johansen stillaði upp fyri Javnaðarflokkin á kommunuvalinum 12. november. Men 21. november boðaði hann frá, at hann meldaði seg úr Javnaðarflokkinum.

Kringvarpið hevur roynt at fáa eina viðmerking frá Bjarna Johansen og Levi Mørk í kvøld, men hvørgin tekur telefonina.