Fara nú eftir lønarlyfti

Næst á skránni hjá Maskinmeistarafelagnum í lønarsamráðingunum er lønarlyft.

Felagið sigur, at eitt protokollat, eitt ískoyti, er í semjuni við Kommunala arbeiðsgevarafelagið, sum var gjørd í gjár, um, at partarnir fyri 1. oktober næsta ár skulu endurskoða lønarflokkingarnar og flokkingingina av leiðandi størvunum.

Maskinmeistarafelagið hevur leingi viljað havt lønarlyft, so føroysku maskinmeistaralønirnar um ikki annað kunnu nærkast lønarlagnum í londunum rundan um okkum.

Ikki minst, tá hugsað verður um, at kappingin um maskinmeistararnar er á einum altjóða arbeiðsmarknaði, sigur Maskinmeistarafelagið.

Lønarlyftið var ikki tikið við hesaferð, tí felagið raðfesti arbeiðstíðsreglurnar.