Grønlendingar vilja aftur í ES

60 prosent av grønlendingum vilja fegnir hava Grønland at gerast partur av ES aftur.

Tað vísir ein meiningakanning, sum depilin fyri uttanríkis- og trygdarpolitikk á grønlendska universitetinum hevur gjørt, sambært grønlendska kringvarpinum KNR.

702 fólk vóru við í kanningini.

Hetta er ein vend, tí í eini líknandi kanning í 2021 søgdu 60 prosent av teimum spurdu seg vera ímóti, at Grønland aftur gjørdist limur í ES.

Rasmus Leander Nielsen, leiðari á grønlendska universitetinum, sigur við KNR, at stóra undirtøkan fyri ES kann hava okkurt at gera við, at ein nýggj ES-skrivstovan er latin upp, og ES-nevndarforkvinnan Ursula von der Leyen var sjálv í Nuuk og vitjaði.

Fyri skjótt 40 árum síðan, í 1985, bleiv Grønland fyrsta landið, sum tók seg úr ES, ella EEC, sum tað æt tá.

Tað var eftir eina vegleiðandi fólkaatkvøðu í 1982, har 53 prosent av teimum spurdu søgdu, at Grønland ikki skuldi vera limur longur.